Пагаворым
Беларусь – крыніца натхнення
Размова за круглым сталом на тэму «Беларусь – крыніцанатхнення» адбылася на базе раённай цэнтральнай бібліятэкі. 
У адкрытым дыялозе прынялі ўдзел педагагічныя работнікі, актывісты БРСМ і сакратары пярвічак, журналіст. Што сёння цікавіць падрастаючае пакаленне, чым яны ганарацца, якія каштоўнасці выхоўваюць у сэрцы – пра ўсё распавядалася на гэтай сустрэчы. Таксама выказаліся пажаданні адносна таго, дзе і як бы хацелася правесці вольны час на тэрыторыі раёна, якія наведаць знакамітыя мясціны Беларусі, да якіх святыняў датыкнуцца душой. Не замахваючыся на большае, паступіла прапанова уладкаваць у Чачэрску веласіпедную дарожку, або спецыяльную пляцоўку для адточвання навыкаў язды на «двухкалёсніку». Ставіўся акцэнт на добраўпарадкаванне такой дарожкі ў накірунку возера Святое, куды ўлетку масава накіроўваюцца дзеці і падлеткі. У пэўных маладых людзей ёсць намер асвоіць новы від аматарскага спартыўнага віду заняткаў – варкаут. Але для гэтага таксама неабходна абсталяванне і тэрыторыя. Адным словам, калі па нейкай прычыне няма магчымасці выехаць за межы Чачэршчыны, то правесці вольны час хацелася б на карысць і з задавальненнем на месцы. 
В.БАГДАНОВІЧ.